Wie, Prins Maarten de Eerste, met toostemming van de wieze leu der Anzeukkemissie en bie de gratie van de Zotskap kossen tot de 62ste Prins van Losser. Tevens Prins oawer De Lutt, Böaningen, Oawerdeenkel, De Glaan, De Beekhoek, het Hoge Bookel en wiedere boerschoppen. Prins in’t 60ste joar van de oawerkoepelende carnavalsverening de Gaffel Aöskes, Stroatkroeper in hert en leawer, Toozichthoalder van de Gronausestroat, Beschermheer van de Pepperbus, Poortwachter van de Zoeke, Creatief tekentalent en ontwerper van menig carnavalswagen, Bestuurder van SKOLO, de AGVL én de noabers in de Zoeke, Oppertechneut van de beveiliging en ziene deurluchtige adjudanten Kevin en Kris hebt beslötten en loat oe wetten:

  1. Dat wie noa twee joar Corona pauze zeit: ‘wie goat vedan!’, wie bint dan ok onmeunig greuts en blie hier te moggen stoan, as Prins, adjudanten en’t hele span!
  2. Dat wie hopt dat alles en iedereen bie de feesten en optochten kan wean en hem good kan raken, zodat wie der met álle leu samen, nen prachtig carnaval van kunt maken!
  3. Dat wie helaas mangs de kop der nog wa bie hoalen mot, da’w doarum hopt dat het in alle opzichten dit joar nen veilig carnaval wordt!
  4. Dat adjudant Kris in’t zeekenhoes onwies verdoven kan, da’s wis, mer dat in’t viefde joargetijde de enigste verdoving de feestroes is!
  5. Dat adjudant Kevin nen kloken kearl is, mot wödden zegt en dat hij disse proclamatie en anner pepierweark dan ok notarieel vast hef legt!
  6. Dat wie blie bint dat het gala noar de neije Fakkel get en daw’t mooi vind dat ze dee hal der speciaal veur’t carnaval hen hebt zet!
  7. Dat wie oons verheugd op de optocht, hét hoogtepunt in’t carnavalsjoar, dat sommige vereningen alleen het stof der of meusen poesen, want wat wagens stunnen a twee joar kloar!
  8. Dat het met oonze benoeming noe bie de Stroatkroepers wa’n luk aans zal goan, mer da’w ok greuts bint da’w hier as Stroatkroepers kunt en mait stoan!
  9. Dat ‘het Heukske’, bolweark van plezeer tusske Blomenbuurt en ’t Rot ’n veurbeeld mag wean veur heel Losser, dan geet de carnavalsgeest nooit meer kepot!
  10. Dat wie na blie bint met oonzen Hofchauffeur Bjorn, want dan kunt wie het veuren loaten, speciaal veur hem kreeg het centrum van Losser mooie neije klinkers en stroaten!
  11. Dat noa menig crisis en onmeunig gestunt, dat wie doarachter nen groten punt zetten kunt!

En doarum besloet wie met oonzen liefsprök:

“A’t nig löp, heanig an. Wie kroept wa vedan!“

Gömmen te Losser op’n 7mde van de Louwmoand, in oons regeringsjoar 2023
Prins Maarten I, adjudanten Kevin en Kris