Wie, Prins Arjan II, met toostemming van de wieze leu der Anzeukkemissie, bie de gratie van de Zotskap, kozen tot de 63ste Prins van Losser, tevens Prins oawer De Lutt, Böaningen, Oawerdeenkel, de Glaan, de Beekhoek, het Hoge Bookel en wiedere boerschoppen, Prins in het 62ste joar van de oawerkoepelende carnavalsverening de Gaffel Aöskes, Poortwachter van de Veldmoat, Beschermheer van de Beek van Bethlehem tot Moeder Maria, Weendbuul van geboorte mer Aöske in’t hert, zanger van menig leed en kraker van alle noten, de Pavarotti van Aait Vedan en de Iglesias van de Rode Neusen, Hoeder van de BCP, Klooksten kearl in heel het Twentse onderwies, Erekapitein der piraten en ziene adjudanten Raymond en Bert hebt beslötten en loat oe wetten:

  1. Dat wie onmeunig greuts bint hier te moggen stoan, en vanoet ne neije opkoomst teant oe veur te moggen goan!
  2. Dat de Begeleidingscommissie Prins van Losser oons onmeunig zal begeleiden, da’s wis, en dat het wederom de kroamkamer veur de Prins van Losser is!
  3. Dat Daore Trappers, Excelsior en Aait Vedan en alle anderen ,tevöl um op te sommen, met oonze prachtige Losserse optocht onmeunig veur de dag zult kommen!
  4. Dat wie het onmeunig jammer veend, dat Cia Kroon as burgermoo nig blef en dat wie hopt dat eer opvolger ok zo’n warm carnavalshert hef!
  5. Dat wie altied ok carnaval veur de jongere generaties blieft organiseren, want ne jonge leefde veur’t carnaval kan nen leamen lang plezeren!
  6. Dat miene adjudanten eer werk en hobby’s good past, mer noe viert ze carnaval, dus instrumenten, voetbal en stroommeter blieft in de kast!
  7. Dat de Daore Trappers a 66 joar metdreait in’t Lossers carnavalsplezeer, mer noe ok de Hofchauffeuse leawert, da’s veur oons ne grote eer!
  8. Dat wie muziek en zingen hoog in’t vaandel hebt stoan, dat wie doarum hopt dat oonze kapellen onmeunig vaak hen spöllen mait goan!
  9. Dat het Lossers Volkslied ‘Miene Hoesstie’ veur oons is en blif ne eerbiedwaardig leed en dat wie het doarum meer mot zingen, zodat het nig vergeet!
  10. Dat carnaval met al zien tradities en protocol ok wa mangs is ne poppenkast, toch hoald wie dat in eer met volle oawertuuging, umdat het zo bie’t carnaval past!
  11. Dat wie doarum ok nooit mait vergetten, altied en oaweral nen punt achter te zetten!

En doarum besloet wie met oonzen liefsprök:

“Met dit span veurop, zingt Losser hardop!”

Gömmen in’t Aöskesdorp, op’n 6den dag van de Louwmoand in oons regeringsjoar 2024

Prins Arjan II

Adjudanten Raymond en Bert